سياسية- اجتماعية- ثقافية تصدر عن منظمة الجبهة الشعبية لتحرير فلسطين في سوريا		المــــخــــيــــم
الصفحة الرئيسة		شغب المخيم/ يكتبها: د.محمد أبو ناموس

لله صوت

لله يا محسنين.. لله يا ناس.. لله يا أولاد الحلال.. لله يا عالم.. لله يلي بتحبوا الله ورسوله.. حسنة للمسكين.. هالضعيف.. هالمظلوم.. الله يجعل مثواكم الجنة.. ويحشركم مع الأولياء والصالحين.. حسنة لله يا إخوان.. حسنة لله يا إخوان.. حسنة لله تدفع عنكم البلاء بس.. صوتوا لي.. بلكي الله بصوتكم بصير مختار!! شيخ!!

بقي يدور بين الناس من أهل الحي الذي يقطنه.. يستجدي كل من يلتقيه أن يصوت له في الانتخابات، وكله أمل بأن يستعطف الناس ويجعلهم يصوتوا له ويحظى بمخترة الحي!! حتى يصبح أحد أعيان الحارة، بل وربما مختارها وحتى سيدها، وشيخها على  سيف ورمح.

في وسط هذه الجلبة، ومع مرور الشيخ سمع استجداء هذا الشحاذ يستجدي الناخبين أصواتهم.. قهقه بأعلى صوته المجلجل كرعد وقال ساخراً يا محلى هالمنافسة.. بس والله العظيم هاي هي قلة الحياء بعينها.. صحيح اللي استحوا ماتوا!! على كل حال يلا خلينا نضحك شوي، بلكي ربنا يخلي الشيخ خضر الصغير يرضى علينا..

الشيخ طراد: فعلاً هذا هو المرشح المطلوب.. والله عال العال.. حتى هذا الشحاذ صار بنفسه يصير مختار..

مطاوع: يا عم طال الله عمرك شلون هذا الكلب الداشر يتجرأ يوقف بوجهك.. اسمح لي أن أذبحه.. وأريحك.. وأريح الناس منه.

الشيخ طراد: يا ولد!! .. أنت مهبول.. طيب وإذا زعل الشيخ خضر الصغير وقال هاي انتخابات مزورة..

مطاوع: يعني يا عم أخليه يدور بكل الشوارع يشحذ أصوات.. والله ماني قادر أتحمله.. الله يقصف عمره.. ويريحنا منه ومن غيره..

طايع: الدنيا خربانة.. الشحاذ بدو يصير شيخ.. يعني أنا وأنت لازم نقول له يا عم الشيخ!!

مطاوع: يا ولد فال الله يغلب فالك.. يخرب مطنك.. أنت زي الغراب ما بيزعق إلا بالخراب.. الله لا يوفقك.. وكيف ودو ينجح.. والله عمرو ما يفرح فيها وأنا على وجه الدنيا..

مطاوع: يا ولد قل لي ليش بدو يصير مختار؟!

طايع: بيقول بدو يغير هالحال بأحسن أحوال..

مطاوع: كيف يعني؟!

طايع: بيقول للناس أنه بدو يوقف أبو خيزرانة وأبو كرباج كل واحد عند حده، ويخلي الناس مرتاحة وتنام وتشبع نوم قريرة العين، بدو يخلي كل الشحاذين بأحسن الأحوال ويمكن يحطهم حواليه، يشحذوا زي ما يعجبهم..

مطاوع: والله عال العال، طيب مين بدو يرد عليك، والله لو صار شو ما صار.. ييضل شحاذ ابن شحاذ.. وما بيقدر يرفع راسه بسيده وتاج راسه..

طايع: يا ولد أنت مفكرها فلتانة.. لما يصير شيخ والله ليخرب الدنيا ويعمل اللي ما انعمل لا قبله ولا بعده..

مطاوع: يعني شو بتقصد؟!

طايع: خليها في البطن تسطح ولا تطلع برا وتفضح!!